Home
ગુજરાત
કેરી રસિકો માટે ખુશખબર ! ગોંડલ માર્કેટિંગ યાર્ડમાં કેસરી કેરીના 200 બોક્સની આવક, જાણો કેટલો રહેશે ભાવ

કેરી રસિકો માટે ખુશખબર ! ગોંડલ માર્કેટિંગ યાર્ડમાં કેસરી કેરીના 200 બોક્સની આવક, જાણો કેટલો રહેશે ભાવ

07:17 PM March 17, 2026 Gujju News Channel

સૌરાષ્ટ્રના અગ્રીમ ગોંડલ માર્કેટિંગ યાર્ડમાં કેસર કેરીનું વહેલું આગમન થયું છે. પ્રથમ દિવસે 200 બોક્સની આવક નોંધાઈ, જેના મુહૂર્તના બોક્સ રૂ. 2500 થી રૂ. 5500માં વેચાયા. કિલોદીઠ ભાવ રૂ. 251 થી રૂ. 551 રહ્યા. આ વર્ષે કેરી 8 દિવસ વહેલી આવતા સારા ઉત્પાદનની આશા છે. આગામી સમયમાં આવક વધશે.

Gondal market yard Kesar Keri : સૌરાષ્ટ્રના સૌથી મોટા ફ્રુટ માર્કેટિંગ યાર્ડ પૈકી એક એવા ગોંડલ માર્કેટિંગ યાર્ડમાં ઉનાળાની શાન અને ફળોના રાજા 'કેસર કેરી'નું આગમન થયું છે. જેમાં 10 કિલો કેસર કેરીના બોક્સનો ઊંચો ભાવ રૂ. 5500, જ્યારે નીચો ભાવ રૂ. 2500 રહ્યો હતો. ગીર પંથકની મીઠી કેસર કેરીની આવક શરૂ થતાં જ વેપારીઓ અને ગ્રાહકોમાં ખુશીનો માહોલ છે.

► ગોંડલ યાર્ડમાં કેસર કેરીનું આગમન

ગોંડલ યાર્ડમાં કેસર કેરીની પહેલી આવક નોંધાઈ છે, જેમાં ગીર ગઢડાના જસધાર, કંટાળા અને મોતીસર ગામના ખેડૂતો કેસર કેરીના આશરે 200 થી 250 જેટલા બોક્સ વેચાણ અર્થે લઈને આવ્યા હતા. યાર્ડમાં આવેલી ગણેશ ફ્રુટ નામની પેઢીમાં આ માલની ઉઘાડી હરાજી કરવામાં આવી હતી.

► 1 કિલો કેસર કેરીનો રૂપિયા 551 ભાવ

હરાજીમાં કેસર કેરીના સારા ભાવ બોલાયા હતા. 10 કિલો કેસર કેરીના બોક્સનો ઊંચો ભાવ 5500 રૂપિયા બોલાયો હતો, જ્યારે નીચો ભાવ 2500 રૂપિયા રહ્યો હતો. જો પ્રતિ કિલોના ભાવની વાત કરીએ તો, કેસર કેરી 251 થી લઈને 551 રૂપિયા પ્રતિ કિલોના ભાવે વેચાઈ હતી.

► સારા-પૂરતા ભાવ મળતા ખેડૂતોમાં ખુશી

ગોંડલના સ્થાનિક વેપારીઓએ આ પ્રથમ અને મોંઘીદાટ કેરીની ખરીદી કરી હતી. વેપારીઓના મતે કેરીની ગુણવત્તા ખૂબ જ સારી અને ખાવાલાયક હોવાથી તેમને પૂરો સંતોષ છે. બીજી તરફ ખેડૂતોને તેમના માલનો પૂરતો અને સારો ભાવ મળતા તેઓમાં પણ ભારે રાજીપો જોવા મળ્યો છે.

► ગત વર્ષ કરતા સિઝન વહેલી શરૂ થઈ

વેપારીઓના જણાવ્યા અનુસાર, ગત વર્ષની સરખામણીએ આ વર્ષે ગોંડલ યાર્ડમાં કેસર કેરીનું આગમન 8 દિવસ વહેલા થયું છે. જોકે, ભાવની દૃષ્ટિએ દર વર્ષ કરતા આ વખતે પ્રતિ કિલોએ આશરે રૂપિયા 50 જેટલો ભાવ ઓછો જોવા મળ્યો છે. જોકે, આ વર્ષે આવક વધવાની સાથે જ આગામી દિવસોમાં કેરીના ભાવમાં પણ થોડો ઘટાડો જોવા મળી શકે છે

► આગામી દિવસોમાં આવક વધવાની શક્યતા

ગોંડલ યાર્ડ કેસર કેરીના વેચાણ માટેનું મુખ્ય મથક હોવાથી સમગ્ર સૌરાષ્ટ્રમાંથી વેપારીઓ અહીં ખરીદી કરવા માટે આવે છે. હાલમાં રોજના 200 જેટલા બોક્સની આવક થઈ રહી છે, પરંતુ આગામી દિવસોમાં તાલાલા અને ગીર પંથકમાંથી કેરીની આવકમાં વધુ ઉછાળો આવે તેવી પૂરેપૂરી શક્યતા છે.